دايما كان بيجي في بالي سؤال اثناء لعبي للعبه فري فاير علي جهازي الاندرويد جهاز ريدمي نوت 11 برو بلس 5 جي الجهاز اللي بينتمي للفئه المتوسطه العليا هل لو طورت الجهاز الخاص بي من اندرويد الى ايفون هل بيتطور لعبي وهل هيتحسن الايم وهل الهيدشوت هيبقى سهل زي ما ناس كتير بتقول وبما ان من المنطق عشان اعرف اجابه السؤال ده ان شتري ايفون واجرب واعرف الاجابه بنفسي واللي متاكد منه انك كمان عايز تعرف الاجابه ومجالكش الفرصه عشان كده بالنيابه عندك اشتريت هاتف ايفون 13 هنعمله انبوكسينج مع بعض وهنجربه في لعبه فري فاير وهنعرف كل حاجه عن الهاتف بمصداقيه تامه عشان لو حبيت تنقل من الاندرويد للايفون وخايف انك تدفع سعر كبير وفي الاخر متاخدش المميزات اللي كانت في بالك كل ده هنجاوب عليه ان شاء الله في هذه المقاله.

تجربه هاتف ايفون 13 في لعبه فري فاير | iphone13 free fire gameplay

بالنسبه لمواصفات الجهاز اول حاجه عندنا واللي هو المعالج المعالج بييجي سداسي النواه A15 بايونيك اللي هو المعالج بتاع ابل تكنولوجيا 5 نانو عندكم بقى يا اساطير التخزين او الرام التخزين بييجي منه ثلاث نسخ نسخه 128 جيجا وفي نسخه 256 وفيه نسخه 512 جيجا كلهم بياتوا مع 4 جيجا في الرام بالنسبه بقى للكاميرا في كاميرتين في الخلف كاميرا 12 ميجا وكاميرا 12 ميجا برضو للتصوير الواسع والكاميرا الاماميه 12 ميجا طبعا تقارنش الارقام تبع الايفون بالاندرويد نهائي ما تغلطش الغلطه بتاعتي لان ايام زمان لما كان معي موبايل اندرويد كان الكاميرا الخلفيه بتاعتو 108 ميجا لما قارنتو بكاميرا الايفون ميجيش حاجه جنب الايفون نهائي لان طبعا في معالجه للصور عن طريق المعالج والسينسور والعدسه وجوده الصور حاجات كثيره جدا مختلفه .

بالنسبه بقى يا اساطير للشاشه وهي 6.1 انش بدقه 1170 * 2532 الجهاز بيدعم NFC وبيدعم شبكات الاتصال الجيل الثاني والجيل الثالث والرابع وكمان الجيل الخامس بالنسبه بقى للخامات المستخدمه في تصنيع الجهاز بتيجي من الزجاج مع اطار من المعدن يعني الظهر بييجي من الزجاج والفريم من الالومنيوم والهاتف بيجي ضد المياه بشهاده IP68 يعني بامكانك تحط تليفونك تحت الميه لمسافه  6 متر لمده نصف ساعه وميحصلوش حاجه بس طبعا انت هتخاف على الموبايل ومش هتعمل كده .

الكاميرا الخلفيه تاتي بكاميرا مزدوجه حيث تاتي الكاميرا الاولى بدقه 12 ميجا بيكسل بفتحه عدسه  F1.6 وبتدعم المستشعر الجديد لتصوير افضل اما الكاميرا الثانيه فتأتي بدقه 12 ميجا بيكسل بفتحه عدسه F2.4 الخاصه بالتصوير الواسع بالاضافه لدعم الهاتف الى الفلاش الثنائي من نوع ليد فلاش بالنسبه لتصوير الفيديوهات الموبايل بيصور 4k بمعدل التقاط 24 , 25 , 30 و60 فريم وكمان بيدعم تصوير FHD و 2k و 720p وكمان بيدعم تصوير السلوموشن بدقه 4 FHD بمعدل اطار 120 و240 فريم وبيدعم ميكروفون اضافي لعزل الضوضاء .

وكمان يدعم الهاتف السماعات الخارجيه الاستريو واللي بتقدم تجربه صوتيه ممتازه هتفيدنا في لعبه فري فاير انك تعرف الصوت جاي منين بالظبط يمين شمال فوق تحت ومنفذ USB ياتي من النوع لايتنينج .

البطاريه بتيجي بحجم  3240 مللي امبير واعلنت شركه ابل بان البطاريه تعمل بفتره اطول بساعتين ونص من الايفون 12 السابق والبطاريه بتدعم الشحن السريع بقوه 20 وات والشحن اللاسلكي بال macsave بقوه 15 وات والشحن اللاسلكي مع شواحن Qi العاديه بقوه 7.5 وات بالنسبه لعيوب الهاتف او عيوب الموبايل النوتش بتاعه كبير نسبيا حتى برضو بعد ما صغرته ابل 20% مقارنه بايفون 12 وكمان منفذ USB من نوع لايتينينج مش Type c وبيفتقر لدعم منفذ 3.5 مم الخاص بسماعات الاذن يعني مش هينفع تركب فيه هاند فري لازم ايربودز وطبعا ما بيدعمش معدل تحديث عالي بيدعم 60 Hz ولكن 60 Hz في الايفون ممكن تجيب 90 Hz في الاندرويد.

الفرق بين الايفون والاندرويد في فري فاير

الفرق بين الايفون والاندرويد طبعا شيء واضح وصريح مفيش اي لاج بيحصل حرفيا في الجيم كله مفيش حته لاج حصلت حتى في الفايتات اللي ناس كتير كانت بتفايتني في نفس الوقت ما حصلش اي دروب في الفريمات نهائيا وثاني حاجه فرقت معايا اللي هي الجرافيك بشوف المباني بشكل واضح وكمان بشوف اللاعبين عن بعد بشكل واضح وده فارق معايا وثالث حاجه فارقه معايا واللي هي صوت الاستريو بقدر اسمع اللاعبين جايين منين بالظبط زي ما انتم ملاحظين في الفايتات لما بسمع لاعب ورايا على طول ببص ورايا علشان احدد وضعه فين واقدر اخذ قرار صح رابع حاجه فارقه معايا جدا وهي موضوع الحساسيه الحساسيه فعلا اسطوريه انا قللت الحساسيه من 100 خليتها 96 لان الحساسيه عاليه مبقدرش اتحكم في الشاشه وبالنسبه للايم الايم اسطوري جدا .

يمكنك مشاهده جيم بلاي بالهاتف في هذا الفيديو